Nàı̨lı̨ı̨

Įdoò nı̨htł’èt’aatsoa gots’ǫ Whatı̀ Nàı̨lı̨ı̨ wenı̨htł’èı̀chı̀. Womoò goòɂàa ts’ǫ̀ dechı̨nı goghoo, Tsǫ̀tı̀deè dehtsoa ı̨doò neghoa nı̨ı̨lı̨, kwetaı̨lı̨ı̨ nechà-lea dakwełǫ̀ǫ̀ wegoat’ı̨, eyıtł’axǫǫ̀ dıa tanı wheɂǫǫ t’à łats’ı̨ı̨ɂà, ı̨zhıı̀ ts’ǫ̀ hoònǫ-daà-sı̨làı metre nàke kwebehk’ıı̀ wete hodàı̨lı̨. Tı degoo ı̨zhıı̀ kwe k’e wegooghoo, behk’ıı̀ nàwheɂaa gots’ǫ tı hòdàewı̀.

Akwe whaà dıı yeè k’e dè nats’et’ı̨. Nàı̨lı̨ı̨ gà tabàa ts’ı nàı̨ɂa ekǫ deh ts’àts’ehdı̀, ası̀ı weghàts’eɂà gedı. Hanelà nıdè nàı̨lı̨ı̨ wemǫǫ̀ ı̨tła ha dı̀ı̀-le
Wets’àneehdı̀ tł’axǫǫ̀ nàı̨lı̨ı̨ ghàı̨da ha dı̀ı̀-le gedı. K’àlemı̀ neeɂı̨ nı̨dè negha nadąą̀ k’et’ı̨̀ ha dı̀ı̀-le gedı.
K’àlemı̨̀ nàke neeɂı̨ nı̨dè nets’ǫ̀ hoedı ha gedı. Sazı̨ ts’ǫnè welǫ dezǫǫ̀ nı̨dè sazı̨ gots’ǫ godı nezı̨ı̨̀-le agodı ha, gedı. Ekò ets’èɂǫ̀ǫ welǫ gots’ǫ dezǫǫ nı̨dè chı̨k’è gots’ǫ godı nezı̨ı̨̀-le agodı ha gedı.
Francis Zoe

Nàı̨lı̨ı̨ wetł’a kweyı̀ı gòɂǫǫ. Nàılı̨ı̨ wetł’a dǫkeè k’è gòla. Dora wetseè nàı̨lı̨ı̨ wetł’a dèhtła ı̨lè. Whaà gots’ǫ hats’ede ha dı̀ı̀-le dǫ wıızı̀ı yek’èezǫǫ̀-le ı̨lè, eyıt’à ı̨̀łats’ǫ̀ deh welǫ dǫ nageèhɂı̨ ı̨le, hanı̀kò dzę welǫ nèhòı̨wo ekò dǫ ets’èɂǫ̀neè godanaèhɂı̨.
Mike Nitsiza

Nàı̨lı̨ı̨ wegà ı̨zhıı̀ tł’ı kwe nàı̨ɂaa k’e wexetł’ı̨ t’à hodàehtła ı̨lè.
Dǫ wıızı̀ı ekǫ gots’ǫ kwe, eyıts’ǫ nàı̨lı̨ı̨ wemǫǫ̀ eyıts’ǫ ekǫ dı weɂǫ gots’ǫ ası̀ı nıyıı̀chı ha nıı̀le, Chekoa ehłı̨ ekò ekǫ tso wet’à ekwǫ̀kwǫ̀ wek’e ło ahłe gha ekǫ gots’ǫ tso nıı̀hwha ı̨lè. Kǫ̀ sını̀ıhwha tł’axǫǫ̀ wets’ǫǫ̀ naehtła là hòtł’ò edeèhk’è lagodı, nǫehtła ekò wemǫǫ̀ lı̀balà hǫt’ıı̀ wek’enık’ǫ. Tso nàı̨lı̨ı̨ ts’ǫ̀ naewha, Ayı̀ı dàhłà ts’àehye. Ɂǫhdah dagıts’eekeè-le-nǫsı̀ı ekǫ gots’ǫ ası̀ı wıızı̀ı neèhchı ha-le sègedı.
Laiza Jeremickca

Tłeht’oò gǫ̀hłı̨ wekwe kw’ahtıdeè elà hoònǫ Behchokǫ̀ ts’ǫ̀ naedlı̀ ı̨lè.
Akwe whaà Nàı̨lı̨ı̨ ts’ǫ̀ ts’eedè wets’àet’ǫ ı̨lè. Ekǫ degaı k’è gòɂǫǫ sı̀ı dǫ ı̨lèe-nàke zǫ ekǫ geedè agogehɂı̨ ı̨lè.
Francis Simpson

Eyı̀ı deh nezı̨ı̨ ne wets’ı̨ı̨hwhǫ. Eyı̀ı deh ts’ǫ̀ ts’etła nı̨dè eyıts’ǫ wets’àts’ehdı̀ nı̨dè k’àlemı̨̀ t’à gogha nàɂetsı̨̀, hagedı. K’àlemı̨̀ weghàts’eda-le nı̨dè gots’ǫ̀ nezı̨ı̨̀ nàɂetsı̨̀-le, ɂǫhdah hagedı.
Eyıt’àhǫǫ̀ setà dıı hadı ı̨lè, Goxè asagǫ̀ht’e-le nı̨dè, eyats’ı̨ı̨lı̨ı̨̀-le nı̨dè, eyı̀ı nàı̨lı̨ı̨ ekıka wets’ǫ̀ ats’et’ı̨ ha nıı̀le. Ası̀ı t’à gohoɂa nı̨dè ekǫ wets’eɂı̨̀ ha ats’et’ı̨ eyıts’ǫ wets’àts’ehdı̀.
Gots’àdı eyıts’ǫ wets’àts’ehdı̀ zǫ gha ekǫ aaht’ı̨ eyıts’ǫ, hanı̀-le-dè ekǫ k’eahdè-le kò.
Jimmy Nitsiza

Nàı̨lı̨ı̨

Nexè Dàgòdzà Wek’èı̨̀hchı